ابحث في الأسئلة

صندوق العضوية

تسجيل الدخول
اسم المستخدم
كلمة المرور
عضو جديد ؟ - اشترك الآن
نسيت كلمة المرور
تنبيه هام لجميع الأعضاء
لجميع الأعضاء اللذين يواجهون مشكلة فى تسجيل الدخول الى الموقع يمكنك الان استرجاع كلمة المرور بكل سهولة من خلال الضغط على هذا الرابط
استرجاع كلمة المرور


عايز اسكتشات اسلاميه واناشيد للقران

السؤال للعضو : احمد ناجى
بتاريخ : الثلاثاء 20 يوليو 2010

السلام عليكم

انا عايز اسكتشات اسلامية مفيدة ومضحكة لحفله

ولو تبقى الاسكتشات عن القران ماشى

بس مش كلها يعنى كفايه واحده

وعايز كمان اسماء اناشيد اسلامية للقران

  رد : عايز اسكتشات اسلاميه واناشيد للقران
الطاهرة999

اولا
كيفك اخبارك ايه واخبار الدراسه ايه معاك
ربنا يرفع  قدرك
ثانيا هشوفلك الموضوع ده واقولك
دمت بكل ود
قيم الإجاية

4

  رد : عايز اسكتشات اسلاميه واناشيد للقران
elgana

ده اسكتش رائع عن فلسطين


 


مسرحية واحنا مالنا )
المشهد الاول
(
مجموعة من الطلاب يلتفون حول داتا شو يعرض مشاهد من فلسطين ولبنان وبعض الدول الاخرى
ويمرا بهما طالبان يضحكان وهما فى حالة انسجام )
أحمد: اية دا اية اللمة دى
فتحى : ايوة صح عرفتة دا باينله مهرجان السينما للجميع
أحمد: دا باينلها لعبت يا توحة وهنتفرج بلوشى
فتحى : طب ياللا بينا
(
يدخل الطالبان فى وسط المجموعة ويقف طالب من بينهم خطيبا )
طالب1 : وهكذا يا اخوانى العالم الاسلامى كلة يأن ويتعذب
طالب2 : وليس هناك مكان على الخريطة تضع يدك علية الا وتجد مسلم يستنجد بك وبى ان ننقذهم
ونمد يد العون لهم .
طالب3 : فلسطين الشيشان البوسنة والهرسك لبنان العراق كلها جراح فى الأمة الاسلامية
احمد: كابتن كابتن , ايه الاماكن البعيدة قوى دى الشيشان والبوسنة والهرسك مالنا احنا ومالهم .
ط2: مالنا ومالهم اذاى , مش دول بردة بشر ذى ما احنا بشر , مسلمين ذى ما احنا مسلمين ,
ط1 : كل الضحايا اللى احنا شايفنهم دول بينادو علينا ليل نهار .
فتحى : لا يا عم , بينادو عليك انت لوحدك انا عن نفسى محدش نادى عليّـه .
أحمد : وحياتك ولا انا , وبعدين احنا اساساً ساكنين فى السابع يعنى لو حد نده مش هنسمع وإن سمعنا هنكسل ننزل .
ط3 : احنا هنا مش بنهزر احنا بنتكلم عن ناس بتموت ضحايا .
ط1: أم طلعوها من الانقاض حاضنة ابنها , والطفل متشعلق بصدر امه جريمتة إيه , جريمتها أية انهم مسلمين . . ! فوقوا بقى .
ط2 : دم الضحايا بينادى علينا .
فتحى : ياعم دم ايه ! والله العظيم الأرض نضيفة وذى الفل ولسة مسفلتين المسرح اهه .
أحمد : يا جماعة يا جماعة ! احنا جايين الجامعة عشان حاجة واحدة . . ننبسط ونهيص ونتروشن
فتحى : (يعد على اصابعة ) دا يبقوا تلاتة ياحبيبى .
احمد : وبس
فتحى : كدا بقوا اربعة ( يضحك الاثنان معا )
ط1 يا جماعة مين اللى قال كدا بقولك احنا اتخلقنا لغاية اكبر من كدا .
أحمد : لغاية كدا ياعسل كفاية قوى انا هسيبك ويا الضحايا بتوعك وعندى دفنة فى الكافتيريا اخلصها واجيلك اخد العزا بالإذن يا عم المصلح هتصلحوا الدنيا ؟!
فتحى : يمشى وهو يغنى اغنية العيال مين هيشلها

المشهد الثانى
يدخل فتحى واحمد غرفتهما وهما يضحكان ويلقيان انفسهما على السرير
أحمد: البوستة والهرسك الشيشات
فتحى: كوبرى عبود اول فيصل
احمد: انت عارف احلى حاجة فى الموضوع دة , حكاية الضحايا اللى تنادى ليل نهار دى .
فتحى: ياعم داباينلهم عالم فاضية .
أحمد : بقولك إية خلينا فى المهم (احممم) احنا لازم ننام علشان عندنا الليلة سهرة جامدة طحن
فتحى : بينا ننام يا عم الحلو انت كمان خخخخخخخخخ
(
اظلام تام للمسرح يظهر فردان وهما يرتدون ملابس بيضاء عليها أثر الدماء يحاولان ايقاظهما )
أحمد : يوووة يابنى يابنى ارحمنى عايز اتخمد
احد الرجلين : قوم للحساب
أحمد : حساب اية وقرأة اية فى ليلتك الجبر دى
الرجل الثانى : ماقلنالك قوم للحساب
أحمد: قامت قيامتك يافتحى يا فتححىىىىىىى
فتحى : يوووو يابنى انا جيت يام ي ي ياااااما انتو مين وعايزين اية
(
الرجلان معا: احنا الضحايا وجايين علشان الحساب )
أحمد: انت طلبت حاجة دلفرى واكلت مين غير ماتحاسب ؟ إديهم حسابهم ومشيهم
فتحى: يا عم واللة اول مرة اشوفهم
احمد: ايوة بس دى حركة صح حركة وعاملينها فينا علشان تخوفونا
فتحى : اطلع من دول ياعم الحلو انت وهو دا احنا عملتها يجى تلتمتين مرة قبليكم
ضح1 : احنا صبرنا عليك نفد , قوم وبلاش كلام كتير ( يمسكة من زراعة)
أحمد: دا بينلة بجد يا فتحى دا اديهم تقيلة قوى
فتحى انا قايم لوحدى انا مؤدب ونبى ماتزقش
أحمد: مين دول دول
ضح1":بقية الضحايا من صبرا وشتيلا وقانا وجنين وفلسطين والعراق
ضح2: دا غير بتوع البوسنة والشيشان وافغانستان البلاد البعيدة قوى دى
أحمد : كنت بهزر
فتحى: ممكن اعرف انتوا عايزين مننا اية
ضح1 : جايين نحسبكوا
فتحى: تانى . .! تحاسبونا على اية احنا عمرنا ماكان لنا دعوة بحد
احمد: يعنى على بلاطة طول عمرنا فى حالنا ويس
ضح : 2 يابنى افهم ماهو علشان كدة احنا جايين نحاسبكوا
أحمد:إذاى بقى
ضح1 انت ماسمعتش حديث النبى صل الله علية وسلم من لم يهتم بامر المسلمين فليس منهم
فتحى : يعنى اية
يعنى علشان احنا مسلمين ربنا واحد نبينا واحد لازم نشيل هم بعض وإلا....
احمد : واللا اية
ضح2: ماتستحقش تكون مسلم
فتحى : على فكرة ياجماعة انتو مكبرين المسائل قوىاحنا صحيح عمرنا ما اهتمينا باللى بيحصل فى أى مكان فى العالم ا بس احنا ما اذنكوش ما ضرنكوش فى شئ
ضح1 : سكاتكم صمتكم كان هو الخنجر االممدود لصدورنا ولضهرنا كمان
ضح2 : الساكت عن الحق شيطان اخرس
احمد: اذاى ياجماعة فهمونا اكتر
ضح1عارفين قصة التلات تيران والا سد
أحمد : اية دخل دا فى الموضوع بتاعنا
ضح 2 : دا هو دا الموضوع بتاعنا
ضح1 : كان فية تلت تيران الاسود والبيض والاحمر
وكان فية أسد حاول كتير انة ياذيهم اويقربلهم لكن ما قدرش
ضح2 : لانهم كانو يد واحدة قوة واحدة
ضح1 : الاسد كان متأكد انة مش هيقدر يتغلب عليهم الا لما يفرق بينهم
ضح1: فرق تسد
ضح2 : فعلا راح لهم وأقنعهم انهم يعملوا معاهدة سلام وانهم اولاد عمومة واحتمال يكونو اخوات ومن اب واحد
فتحى: وعلى كدة صدقوا
ضح2 : للاسف ذى ما بيحصل دايما صدقوا
ضح1 : وبعدين راح للتور الاسود والاحمر واقنعهم ان الطور الابيض دا شايف نفسة قوى ومتعنتظ ( بصوت منخفض ) وعلى فكرة هو دايما اللى بيدل عليهم
ضح2 : وتقريبا له ميول ارهابية وانة تلقى تدريبات فى افغانستان او ايرن وانة ينتمى لتنظيم القاعدة
ضح1 : الثور الاسود والاحمر ابتدوا يبعدوا حبه بحبه عن التور الابيض
استغل الاسد الفرصة و هجم على طول على التور الابيض استغاث بخواتة فى ظنكم كان رد فعلهم اية
أحمد: اكيد اكيد ماسبهوش لوحدة
ضح2: محدش سمع ولاشاف , و أعتقد انهم قالوا انه يستاهل لأنه جر شكل الأسد , ولأنه كان بيقاومه لما حاول يأكله . .
فتحى : مسكين الأسد !
ضح 1: الأسد ما كتفاش بالتور الأبيض , راح للتور الأسود و أقنعه إن التور الأحمر لونه فاقع قوى , وأنه المنافس الوحيد ليه فى الغابة .
ضح2: و أعتقد كمان إنه أقنعه إنه هيكون حليفه و دراعه اليمين فى المنطقة , آسف فى الغابة . كل اللى كان مطلوب منه الصمت و السكوت و أحياناً الشجب و الإدانة .
ضح1 : طبعاً أكيد وصلتوا لنهاية القصة , التور الاسود يا سادة أصبح وحيد .
ضح2 ( متهكماً و هو ينظر إلى أحمد و فتحى ) : ما هو كان فى حاله و ملوش دعوه بحد .
ضح1: لما جت اللحظة الموعودة و فاق من الصدمة اكتشف .
ضح2: إن كل الوعود و المواثيق الدولية خدعة كبيرة .
ضح1: التور الأسود قال كلمة بقت حكمة , وكل الناس بترددها لحد دلوقتى .
ضح2: إنما أكلت حينما أُكل الثور الأبيض . . .
فتحى : تقصد إن إحنا كنا التور الأسود , وانتم كنتم التور الأبيض ( مشيراً إلى الضحية 2)
ضح2: بس لو سمحت ما تشاورش .
ضح1: صح مظبوط تمام .
ضح2: و سكاتكم كان هو السبب فى اللى وصلناله دلوقتى . أصبحنا يا سادة ( مشيراً إلى نفسه و إلى زميله ) ضحايا .
أحمد : لأ لأ , انتم بتبالغوا , انتم كده بتظلمونا , محدش كان يقدر يعمل لكم حاجة .
فتحى : أيوة إيه اللى كان فى إيدينا نعمله .
ضح1: كنتم تقدروا تعملوا زى المعتصم .
أحمد : المعتصم ! , و إيه بقا اللى عمله المعتصم .
ضح2: المعتصم يا سيدى كان خليفة المسلمين , ولما أسر الروم إمرأة و احدة بس صرخت بأعلى صوتها . . وا معتصماه . . وا معتصماه
(
إظلام المسرح و إضاءة بجانب آخر )
يبدأ المشهد على كرسى يجلس عليه خليفة المسلمين , يدخل عليه الوزير مهرولاً .
الوزير : يا خليفة المسلمين , يا خليفة المسلمين .
المعتصم : ماذا هنالك يا رجل , ماذا حدث .
الوزير : أ ُسرت إمرأة فى الروم و نادت بأعلى صوتها مستغيثة بك قائلة : وامعتصماه وامعتصماه .
المعتصم : وا إسلاماه وا إسلاماه .
اكتب هذه الرسالة . . من المعتصم أمير المؤمنين إلى كلب الروم , إن لم تأتينى المرأة فسوف أرسل إليك جيشاً أوله عندك و آخره عندى .
(
إظلام مع وجود أبيات شعرية ,
رب وا معتصماه انطلقت ملئ أفواه الصبايا اليتم ِ
صادفت أسماعنا لكنها لم تصادف نخوة المعتصم
إضاءة )
ضح2: بالفعل تم إعداد هذا الجيش و لكن الروم أرسلوا المرأة معززة مكرمة تحرسها كتيبة من النساء
ضح1: و أرجع المعتصم للأمة كلها كرامتها و عزتها .
أحمد : شفت بقا , أهو دا أكبر دليل على كلامنا .
فتحى : فعلاً , إحنا مش معتصم إحنا مش خليفة للمسلمين , إحنا مش رؤساء دول , روحوا حاسبوهم إحنا مالنا .
أحمد : إحنا مجرد أفراد ضعفاء , مفيش فى إيدينا أى شئ نعمله .
ضح1: مين اللى قال كده .
ضح2: فيه فى إيديكو ميت ألف طريقة تعملوها .
فتحى : لأ قول لنا طريقة واحدة كفاية .
ضح1: أقل شئ إنك تحس بآلامنا .
أحمد : نحس بآلامكم ! تقصد إيه .
ضح 2 ( مشيراً إلى مجموعة من الضحايا ) : كل الضحايا دول كانو زيك , ليهم أحلام . آمال .. طموحات , و فى لحظة واحدة صاروخ غادر هدم البيت موت الأم و الأب و الطفل , وفى نفس اللحظة كل الأحلام اتساوت بالتراب .
فتحى : برده مش فاهم إزاى أقدر أحس بآلامهم .
ضح1: اسألهم . !
(
يتجه فتحى إلى مجموعة من الضحايا من بينهم طفلة و يبدأ فى سؤالهم )
فتحى : انتم منين ؟ و إيه اللى عمل فيكم كدة ؟ إيه قصتكم ؟
طفلة : أنا من لبنان , مش قيم الإجاية

3

  رد : عايز اسكتشات اسلاميه واناشيد للقران
مظلوم

السلام عليكم ورحمة الله وبركاته

بعد البحث والتحري تم استهداف الهدف لأحلي عضو

اليك بعض الاسكتشات

بسم الله نبدأ

الاسكتش الاول

الارسال

الاسكتش
يحتاج الى ثلاث شخصيات

مذيع نشره وطباخ ومعلق كره ويبدأ كل واحد
بتقديم فقرته ولكن تتداخل القنوات فيصل البرنامج للمشاهدين هكذا

المذيع:سيداتى
انساتى سادتىالسلام عليكم ورحمه الله وبركاته واهلآ بحضراتكم معنا فى نشره
الاخبار الاولى لهذا اليوم وفى نشرتنا

الطباخ:3 اكلات جديده
ونوعين من الحلويات بنقدمهم النهارده لست البيت وخصوصا السيدات العاملات
اللى بيعتبروا.....

المعلق:خط هجوم للفريق القومى اللى على ايدك
الشمال والفريق القومى النهارده بيتكون من خط هجوم....

المذيع:الساده
الوزراء والمحافظين...

المعلق:وخط النص...

المذيع:كبار
رجال الدوله.....

المعلق:اللعيبه النهارده.....

المذيع:أدوا
اليمين الدستورى وعاهدوا القياده السياسيه على وضع الشعب فى...

الطباخ:حله
كبيره قوى,وتقفليها خالص خالص واوعى حاجه تخرج منها,وبعد ما تتاكدى من قفل
الحله تجيبى...

المعلق:3لعيبه من خط النص...

الطباخ:وتغسليهم
وتنشفيهم وتقطعيهم كويس وعلى طول تروحى حطاهم....

المذيع:فى
الوزاره القادمه التى تهدف اساسا الى اتباع سياسه...

الطباخ:سد
الحنك...اعملى حسابك يا سيدتى ان سد الحنك من الاكلات المحبوبه خالص وخصوصا
عند....

المعلق: الحكام الدولين.. الحكام الدوليين النهارده على
اتم استعدادلأداره المباره اللى بتقام تحت رعايه وزاره الشباب....

المذيع:وقد
صرح السيد الوزيران خطه الوزاره فى المرحله القادمه تهدف الى استغلال
طاقات الشباب وكيفيه تشغلهم فى المشروعات الصيفيه مثل مشروع....

المذيع:
لم الكره من ورا الجوان وبيديها للجون لكن ياخساره بتقع فى ايد....

المذيع:وزاره
الدخليه والتى صرحت باعتقال عدد من المتطرفين وقالت انها سوف....

الطباخ:
هتدبحهم وتقطعهم وتفرمهم وبعد لما تسويهم علطول هتقدمهم لـ.....

المعلق:
الحكم الدولى...الحكم الدولى مصمم على طرد اللعب رقم8لانه رفض....

المذيع:التصويت
على استخدام القوات العسكريه ضد لبيا وقال ان الامتناع عن استخدام هذه
القوات لأنقاذ مسلمى البوسنه والهرسك والمطالبه باستخدامها ضد لبيا يعد
بمثابه.....

الطباخ:كوسه....الكوسه لازم تكون صغيره علشان تقدرى
تحشيها وبعد ما تقوريهاعلطول تحشيهابـ......

المعلق:الجماهير
العريضه اللى جايه النهارده تستمتع....

المذيع:برؤيه السيد الوزير
وهو يتكلم وقد نفى سيادته وجود علاقه بينه وبين ابو الهول وقال سيادته انه
قد تبين له ان الشعب يحتاج الى قدر اكثر واكثر وانه ينفذ تعليمات....

الطباخ:ابله
نظيره... وابله نظيره زعلانه قوى قوى

المذيع: على المسلمين فى
فلسطين حيث عبر المندوب عن استيائه الشديد من معامله....

الطباخ:ام
على...ام على احسن حاجه تقدميها بعد الاكلات الدسمه دى تجيبى...
المذيع:
العالم العربى والاسلامى....

الطباخ:وتحطيهم فى الفرن لمده10دقائق
وتقدميهم..

المذيع:للنظام العالمى الجديد...

المعلق:اللى
هيشوط بره اوت يا خساره..يا خساره...

الطباخ:باظت البصاره..مش
قلتلك متحطيش ملح كتيرعلى البصاره على العموم تقدرى تسبيها زى ماهيه
وتقدميها....

المذيع:للمفاوضين العرب فى محادثات السلام العربيه
الاسرائيليه وقد صرح مندوبنا هناك ان الوفد الاسرائيلى...

المعلق:واخد
الكره وبيشوط وبيشوط صاروخ قنبله...

المذيع: فى قلب العالم
الاسلامى حيث استنكر سيادته عمليات القتل الجماعى التى يتعرض لها المسلمون
فى بقاع العالم وعلى راسها فلسطين والبوسنه والهرسك وطالب سيادته بتكاتف
المجتمع الدولى من اجل انقاذ...

الطباخ:صوابع زينب..وطبعا منتوش
عارفين ايه هيه صوابع زينب على العموم دا نوع جديد من الحلوى واكتبى معى يا
سيدتى المقادير...تجيبى...

المعلق: الحكام الدوليين...

المذيع:واعضاء
الكنست الاسرائيلى...

الطباخ:وعلى طول تروحى رمياهم فى
الزباله...واى بواقى متسيبيهاش عندك علشان متعملكيش ريحه مش كويسه...وبعد
كدا تحطى الخلطه فى الـ....

المعلق:الفريق الاجنبى اللى عامل لعبه
خطيره ومكاره بيلعبها..

المذيع:مجلس الامن والذى رفض بقاء قوات حفظ
السلام فى البوسنه والهرسك وقال ان هذه القوات صنعت اصلا لحمايه...

الطباخ:
الكلاب..خلى بالكمن الكلاب لانهم لو شموا ريحه اللحمه على طول هيهجموا
على...

االمعلق:الجماهير اللى بدات تنصرف بعد صفاره الحكم وبكده
تنتهى المباره بهزيمه الفريقين

الطباخ:وبالهنى والشفا يا سيدتى
ولقائنابكره مع برنامج,,لك يا سيدتى,,

المذيع:وبهذا سيداتى انساتى
سادتىنأتى لختام برنامجنا المفتوح وكل يوم مفتوح ونتمنى ان تكونوا قد سعدتم
معنا ومع مسك الختام القران الكريم بصوت الشيخ....ايه لسه بتصحوه ماشى
ماشى
ياتى الشيخ وعليه علامات النوم فيستعيذ ويسمى ويقرا "قل هو الله
احد" ويهدده المخرج بان ينهى والا

....


الثاني


( أنوار ساطعــة والأب يخاطب ابنــه )
الأب : أي بني.. أوصيـك مراراً
وتكرارا .. إياك إيـاك من مصيـدة الحبـال ، خدّاعه هي تلك الحبال تغريك
بزينتـها لتوقعك في فخهـا ...
الابـــن :أنـا لك يا أبتـاه بـار .
الأب
:كم من إنسان قد غوته، كم من إنسان قد قيدتـه، لا تجب من دعاك لهـا، أو
أغراك بالاقتراب منـها.
الابـــن : لا تخش على ابنك يا أبتـاه.
الأب
: لا تنس ما أوصيتك به ( يكررها وهو خارج من المسرح )
الابـــن :ما
بـال أبي قد أعاد على وصاياه ، أظن مني ذلك الابن
العاق، أم بليـد
الفهم الذي لا يعي ما قد له يقال .
( يدخـل الصديـق )
الصديــق :
أهلا بصديـق قد غاب عن الأنظار، وحالت المسافات عن رؤيـة محيـاه. (
يتعانقـان )
الابـــن :أي يوم سعيـد هذا أن أرى صديق الطفولة، أهانت
عليك العشرة وأيــام الصبـا والسعـادة .
الصديــق :أعمـال كثيـرة
قيدتنـا هذه الأعمـال.
الابـــن :المهم أني رأيتك بعد طول غيـاب.
الصديــق
:وغيـر ذلك، أنــا أدعوك لرؤية ما لم تراه عينـاك منذ أن أبصرت الوجود.
حبـال
جميـلة، ملونة، مزخرفة، أي متعة في رؤيتها، أي لذة في لمسهـا ومسكهـا.
الابـــن
:حبال!! كأن أذني قد مر عليـها هذا المقـال!!
الصديــق :بل شيء جديد..
من عاش بـها كان سعيد.
الابـــن :أوووه ، تذكرت، أبي أوصاني بالبعد عن
حبـال.
الصديــق :أباك أوصاك!!! وهل لأبيك علم بهذه الحبـال.
الابـــن
:كرر علي الوصايا عن حبـال تغري المرء بزينتها.
الصديــق :يا هذا، دع
عنك تخاريف المسنين وأوهـام الخائفيـن، ولا تحرم شبابك من لذة الحيــاة.
(
تظهر طاولات يسار المسرح وعليهـا حبال متدلية كالمشانق بألوان وأشكال
متعددة )
الابـــن :ما أروعهــا..
الصديــق :والأروع لمسهــا، واللذة
في القرب منـها.
الابـــن :لكني أخشى من الاقتراب.
الصديــق :اقتـرب
لا عليـك ، كيف تخشى وغيرك عشرات بل مئـات ما حرمـوا أنفسهم من لذتـها....
أقتـرب...
( يمسك الابن بإحدى الحبال ،يقلبها وهو يظهر السرور ثم يضعها
في يده، فتقيده فتطفئ الأنوار سوى نور ضئيل)
الابـــن :يا ويــلي ما
بال الظلام علي قد حل .
( يخرج شخص مقنع يرتدي السواد بالكامل يمسك
الحبـل من نهايتـه ، يطلق ضحكة مرعبـة ويقوم بجر الابن والدوران به في حلقة
ضيقة )
الابـــن :أنت !! من أنت ، أتركني أتركني ....
المقنـــع : (
ضحكة مرعبــة) أنـا سيدك، فأنت قد غدوت عبداً لي
الابـــن :عبداً لك
!!!أنــا ما كنت عبداً لأحد.
المقنـــع :قد غدوت الآن عبدا.
الابـــن
:أيها الصديق، فكني من قيد العبوديـة.
( ويظهر شخص مقنع يمسك بطرف حبل
يحيط بالصديق، ويفضل أن يكون قيد الصديق من الرقبـة)
الصديــق :لمـاذا
تريد الخروج من لذة الحبـال ومتعة الأصفاد.
الابـــن :قد غدوت عبداً
لحبل، أسير معه إن سار وأقف معه إن وقف.
الصديــق :استمتع بوقتـك،
فهنـاك من يتمنى بعض ما عنـدك من لذة.( يخرج من المسرح )
الابـــن : (
يشاهد المقنع2 يجر صديقه) وأنت كذلك، غدوت عبداً لحبل، كيف لم أشاهد قيدك،
ليتنـي أمعنت نظري فعرفت ذل من يدعوني إلى ذل.( يعض على أصابعه) ليتني ما
أرخيت سمعي لعدو ظننته
صديقا، آآآآآآآه يا حسرتي وبؤسي آآآآآآه.
(صوت
الأب :أين أنت يا بني؟؟ مالي افتقدك بين الأنوار)
الابـــن :إنـه أبي، و
أخجلتاه، من رؤية ابنه العاق قد صار عبداً لحبل رخيــص، كيف لي أن أتوارى
من ناظريه.
( يدخـل الأب )
الأب :أي بني، استعبدتك الحبـال.
الابـــن
:وأخجلتـاه علم أباي.
الأب :أما كنت لك من الناصحين.
الابـــن :منكس
رأسي يا أبتي، ذليل هو ابنك، القيد مـا حز معصمه لكنه يا أبتـاه قطّع
قلبه، أي ألم في جسمي يعتصر ،أي سم في كل لحظة منه أرتشف، غاب ابنك يا أبتي
عن الحيــاة ، فلا حيـاة في حلكة الظلماء يا أبتاه.
الأب :عـد إلى
النــور يا بني، النـور إليك يا بني مشتـاق.
الابـــن : ( تنهيـدة) بل
الظمآن إلى المـاء يشتــاق، آآآآآآآآه القيـد، القيــد يشدني إلى سحيق
الظلمة، ويمنع عن النـور عني للألف العتمة.
الأب :النـدم أولى خطوات
الحريـة.
الابـــن : (مستبشراً) وهل بعد العبودية من حريــة ؟
الأب
:الحرية هي النور في قلبك، هي الفضاء الواسع في صدرك.
الابـــن
:والقيـد؟!! هل أظل مقيـداً هكذا مدى السنين.
الأب :بل الأمر ملك يديك،
إن أردت فعلت.
الابـــن :أبتــاه، أرجوك عقلي لا يكاد يستوعب.
الأب
:إن أردت يا بني، فثر على قيدك كسر أغلال سجنك.
الابـــن :أنــا؟!!
إرادتي أنــا؟؟ كيف والحبل يلف معصمي وبقوة أكثر تفوقني يشدني.
الأب
:يخيل إليك قوته، وتظن في نفسك جسارته، بل هو ضعيف ،ضعيف يا بني.
( يقوم
الابــن بشد المقنــع فيشده بقوة ليطيح به أرضـاً )
الابـــن : (
بنبـرة حزينــة) كتب عليّ العيش عبداً لحبل رخيص.
الأب :بل إن عزمت
فامض ولا تتخاذل، ما كان لحبل أن يستقوي إلا بعد أن رأى ضعفك، أريه منك قوة
وعزيمة و إصرار ستجده أمامك يتهاوى ضعيفاً حقيراً هينــا يركض هارباً لا
يلوي على شيء.
( يقوم الابـن بشد المقنــع بقوة فيتهاوى المقنـع ساقطـاً
، فينفك عن الابن القيد) ( تضـاء جميــع الأنــوار)
الابـــن :أمضيـت
بعض من عمري عبدا لضعيف من الضعفاء.
الأب :يدعو إليها شيطان إنسيـا كان
أم جنيـا ، يظن منـها سيطرة على نفسه وهي الضعف يتجلى في كلمة الضعف،
بالجهـاد الأكبر يتغلب المرء عليـها
الابـــن :كيف لم أعي ما وصيتني به
يا أبتاه.
الأب :قد أخطــا أبانا يا بني من قبل، ومازلنـا في أثره
سائرون فيا ليتنـا سرنـا على خطــاه في توبتـه، هي الذنوب يا بني تلك
القيود ، فلا تدع الذنب يقيدك.


-------------

الثالث

يجلس الشيخ في أحد المساجد الصغيرة في إحدى قرى الصعيد على مصطبة عريضة
مربعا قدميه و ممسكا بالسبحة وعلى وجه علامات القرف وهو ينظر إلى الحاضرين
الجاسين على الأرض……
يلتف الحاضرين بمختلف الهيئات حوله ووجوهم البسيطة
تعبر عن حالهم ………
أحد الحاضرين : يا شيخنا هل تسمح لنا باستشاراتك في
بعض الأمور الفقهية وأن نأخذ القليل من علمك الغزير
ينفش الشيخ صدره
ويهتز يمينا وشمالا وينظر إلى إلى الحاضرين ويمد يديه في وقار وهو يقول: من
أراد الفتوى أفتيييييه ومن أراد العلم أعلمممه ومن أراد الهداية أهديييه
يهلل
الحاضرين الله عليك ياعم الشيخ ويقم بعض الحاضرين ليقبلوا يده ولكن الشيخ
يسحب يده "استغفر الله أستغفر الله "
يقم أحد الحاضرين ويسأله: ما رأيك
يا شيخنا الجليل في الأغاني بتوع اليومين دول
ينظر إليه الشيخ : وهو
يقول في حكمة :
ياسلاااااااااااااام يا سلااااااااااااااام هذه هي
الأسئلة
في الأغاني رأيااااااااااااااااان
الرأي الأول يقول أن
الأغاني حلاال حلاال حلااااااااااااااااال
والرأي الآخر يقول أنها حلال
حلال حلاااااااااااااااااااال بل وهي طرب جميل يجب للإنسان سماعه لما فيها
من معاني طيبة ونقية تطيب الروح والبدن……
ففي قول المغني: ياما القمر
على الباب فكلمة "ياما" فيها دعوة لبر الوالدين والتمسك بالعادات فلم تقل
يا مامي أو ياماما"-أما في كلمة القمر ففهيا دعوة للتأمل أما في كلمة على
الباب ففيها دعوة للاستئذان
يصيح أحد الحاضرين: اللللللللللللللللللله
الله عليك ياعمنا الشيخ
يكمل الشيخ واثقا وهو ينظر للحاضرين يمينا
ويسارا:
أما في قول عبد الحليم نار ياحبيبي نار ففيها دعوة للنفور من
النااااااااااار.
يهلل الحاضرين "الله أكبر الله أكبر" ويهبوا لتقبيل يد
الشيخ الذي يصيح قائلا: استغفر الله استغفر الله
ويهب أحد الحاضرين
ويقدم أحد الشرائط للشيخ فيتفحص الشيخ الشريط في قرف ويقول لمن هذا
الرجل:-
لعمرو دياب
الشيخ: ونعم الرجال وإن كنت أفضل مصطفى قمر
يمد الرجل
يده ليستعيد الشريط ولكن الشيخ يدسه في جيبه وهو يقول هدية مقبولة منك ولقد
قبل الرسول الهدية..
يهب أحد الحاضرين وهو يترنح وعينيه سكيرتان يسأل
الشيخ: وما رأيك ياسيدنا الشيخ في سيجارة البانجوا–("همممممف"-شمة
ينظر
إليه الشيخ : وهو يقول له في حكمة :
هذا سؤال جميل وهناك رأيان في هذا
الموضوع
رأي يقول أنها حلال حلال حلاااااااااااااااااااال
والرأي
الآخر يقول أنه إذا غلب التبغ على البانجو فهي حلال حلال
حلااااااااااااااال وأما إذا بلغ البنجو على التبغ مثل الملفوف فهي حرام
يهلل
الحاضرين : الله أكبر ربنا يجبر بخاطرك ياسيدنا الشيخ
ويهب السائل
ويخرج علبة سجائر ثم يخرج ملفوف ويعطيه للشيخ ("همممممف"-شمة) ..ربنا يجزيك
خير ياعم الحاج
يتفحص الشيخ الملفوف ثم يقول هذه غلب البانجو فيها على
التبغ لا بأس إن الله غفور رحيم!!!!ثم يضع الملفوف خلف أذنه !!!
يقوم
أحد الحاضرين ويسأل الشيخ ما رأيك يا شيخنا في ما يحدث للعراق من قتل
والحكومــ……………….
هنا يقاطعه الشيخ صارخا : اسكت أخزاك الله
ينظر
الرجل البسيط إلى الشيخ في دهشة واستغراب
يكمل الشيخ :- احنا مالنا ومال
العراق اشهدوا ياناس هو اللي قال العراق مش أنا
يهدئ الناس الشيخ
ويوجهوا اتهامات للرجل الذي ينصرف غاضبا
يهب أحد الحاضرين ويسأل الشيخ
ياشيخنا ما رأيك في خروج الريح والتي صوتها يدبدب وريحها تهبهب
وهنا
يمزمز الشيخ بشفتيه قائلا: ياسلااااااااااااااااااااااااااااااااااام هذه
هي الاسئلة النبيهة التي تدل على النباهة والذكاء
يبتسم السائل في بلاهة
فخورا بنفسه
يكمل الشيخ: أيضا في هذا الموضوع هناك رأيــــــ…….
يدخل
شيخ آخر من الباب لابسا العمامة ويقاطعه صارخا : إيه يا ولا .. اللي قعدك
على الكرسي بتاعي .. إنت نسيت إنك فراش المسجد ولا إيه
ينظر الرجل (الشخ
سابقا) إلى الرجل في فزع وينظر إليه الناس في دهشة وهم يقولون:
فراااااااااااااااااااش!!!!!
وهنا يمسك الرجل بجلبابه ويضعه في فمه ثم
يمسك الشريط بيده اليمنى والبانجو بيده اليسرى ثم يقول
:زوغااااااااااااااااااان
وهنا يصيح الناس راقضين خلفه : فراش وعملنا
شييخ يابن الـ…… ((أمسكوووووووووووووووووووووووووووووووووه)


وانا في الخدمة

وان شاء الله سوف انزل مكتبة اناشيد جامدة جدا

من رفعي وعلي المديا فير الذي يدعم الاستكمال

تم بحمد الله

قيم الإجاية

0

  رد : عايز اسكتشات اسلاميه واناشيد للقران
elgana

طفلة : أنا من لبنان , مش بعيدة قوى عنكم , كنت فاكرة إنى قريبة قوى منكم , قبل ما تحصل المذبحة
أحمد : مذبحة إيه ؟!
طفلة : كنت أنا و أخويا محمد الصغير و أبويا و أمى فى بيتنا , نايمين , حاضنين الحلم و الدفا .. و جوانا قلوب بتحب كل الكون , و تكره الحرب و الدمار , و فجأة إتحول الحلم الجميل لنار بتحرق كل حاجة , أمى ماتت قدامى . . أخويا محمد . . أبويا , و فى الآخر كان الدور عليّـه .
ما كنتش متخيله إن الدنيا وحشه و إن فى وحوش فى هيئة بشر , وإن العالم كله هيتفرج عليّـه و أنا بموت و الرصاص بيقطع كل حته فى جسمى . . إيه اللى انت عملته , إيه اللى انتوعملتوه .!
كنتوا ممكن تقولوا لأ , كنتوا ممكن تقفوا جنبنا , و كان ممكن أبقى لسه عايشه و سطكم . . إنتوا اللى قتلتونى , , , إنتوا اللى قتلتونى .
ضح1: يا ترى حسيتوا بالألم ؟
فتحى : صدقنى إحنا بنحس , و بنتألم , بس انت برده مجاوبتنيش على سؤالى . إحساسى بالألم هيغير إيه ؟ !
ضح1: إحساسك بالألم هيخليك ترفع إيديك للسما , تدعى .. تقول يا رب ساعدنى , نفسى أكون معاهم , نفسى أخفف عنهم .
ضح2: دى بقا اسمها سهام السحر .
ضح1: دى سهام من ربك مضمونة , محدش يقدر يردها أو يمنعها .
ضح2: إحساسك بالألم هيخليك تتبرع بكل اللى تقدر عليه , علشان أخوك فى فلسطين أو فى لبنان أو فى العراق ما يموتش من الجوع و انتا شبعان , يلاقى البطانية اللى تدفيه , يلاقى الرصاصة اللى تدافع عنه .
ضح1: احساسك بالالم هيخليك تقاطع المنتجات الى اعداءك بيعملوها وانت تدفع فيها فلوس تتحول للرصاصة للدانة لمدفع تموتنى وتموتك وانت اللى دفعت تمنها
ضح2: إحساسك بالألم هيخليك تحسس الدنيا كلها بنفس الألم
ضح1:عارف زى مين . !صلاح الدين الأيوبى .. أكيد تسمع عنه ! ليه كلمه مشهورة قوى .
ضح2: كيف أضحك و القدس أسير . .
ضح 1: صلاح الدين الأيوبى حس بالألم , حس إن المسجد الأقصى أول القبلتين و ثالث الحرمين فى الأسر , و أنه بيستغيث بيه , و أنه لازم يحرره من الأسر . ما قدرش يضحك غير لما حرره .
أحمد : يا جماعة صدقونى إحنا اتأثرنا قوى و تعبنا قوى و حسينا إن إحنا كنا بعيد قوى .
فتحى : ممكن بقا نمشى ؟ متشكرين قوى يا جماعة , سلام عليكم .
ضح2: على فين يا حبيبى ؟ انت كنت فكرنا بنهزر؟ دى محكمة , و فى حكم و ها يصدر عليك دلوقتى
أحمد : و مين بقا اللى هايحكم علينا ؟
(
الإتنين فى نفس واحد ) الضحايا .
ضح2: و دلوقتى هنسمع الحكم . . أظن إن الضحايا سمعوا بما فيه الكفاية دفاعكوا عن نفسكوا . و مستعدين دلوقتى لنطق الحكم .
ضح1: القرار للضحايا , هل ترى الضحايا بعد كل ما سمعناه من السيد أحمد و السيد فتحى و بعد كل ما علمناه أنهم كانوا لا يعيشون سوى لانفسهم , و لم يهتموا يوماً لما يحدث فى العالم .
هل ترى الضحايا أنهم مذنبين ؟
(
صوت جماعى للضحايا كآنه صوت آلى ) مذنبين , مذنبين
(
وهما يلتفون حول أحمد و فتحى فى شكل دائرى )
ضح1: و إيه الحكم اللى شايفاه الضحايا ؟!
الضحايا فى صوت واحد : لازم يحسوا بالألم . . لا زم يحسوا بالألم .
ضح2 : حسسوهم بالألم .( الضحايا ـاخذ أحمد و فتحى إلى مكان مظلم فى جانب المسرح )
أحمد وفتحى يصرخون : لأ لأ .
خلاص إحنا فهمنا , سيبونا نعيش مش معايزين نبقا ضحايا .
(
إظلام تام للسرح , ونهاية المشهد )









المشهد الثالث
(
اضاءة يظهر على المسرح أحمد وفتحى وهما فى حالة دهشة)
فتحى: اية دة انت حلمت باللى انا حلمت بية
احمد: مستحيل دا يكون حلم
فتحى: امال دا اية
احمد: دا اكيد علم
فتحى: يعنى المأسى اللى احنا شوفناها دى بجد والضحايا دول بجد
احمد:يبدوا يا فتحى انها كانت طول عمرهابجد بس احنا دايما ذى النعام بندفن راسنا فى التراب
فتحى: طب والحكم اللى صدر علينا
أحمد : اتنفذ
فتحى: أذاى
أحمد: مش قالو لازم نحس بالالم
فتحى : فعلا واحنا حسينا بالالم والندم كمان يا ترى الوقت فات ولا ممكن تعمل حاجة
احمد: اكيد لسة فية قدمنا فرصة واول حاجة نعملها اننا ذى ما حسينا بالالم لازم كل الناس وكل الشباب اللى زينا يحسوا بالالم هما كمان
فتحى: وما يقولوش ذى ما احنا قلنا ( أحنا مالنا )












(
تبداء موسيقى التتر وتبداء اغنبة الختام)

ياللى بتقولو احنا مالنا
احنا خلينا فى حالنا


ياللى بتقولو احنا مالنا
احنا خلينا فى حالنا
مهما كات النار بعيدة
إن سكتنا هتيجى دارنا


مهما كات النار بعيدة
إن سكتنا هتيجى دارنا


إن سكتنا هتيجى دارنا


ــــــــــــ
اوعى تبقى شيطان وأخرس
يوم ماتلقى الحق تخرس
اوعى تبقى شيطان وأخرس
يوم ماتلقى الحق تخرس


غير المنكر بكفك
وان عجزت هيكفى قلبك


غير المنكر بكفك
وان عجزت هيكفى قلبك


ــــــــــــ
فينك انت مش لاقيك
شوف عدوك بين عنيك


فينك انت مش لاقيك
شوف عدوك بين عنيك
فاكر انك مستخبى
ناسى ان الدور عليك


فاكر انك مستخبى
ناسى ان الدور عليك


ــــــــــــ
صدقونى الدم واحد
صدقونى الجرح واحد


صدقونى الدم واحد
صدقونى الجرح واحد
يوم م تحزن ولا تبكى
عين أخوك تبكى عليك


يوم م تحزن ولا تبكى
عين أخوك تبكى عليك


ياللى بتقولو احنا مالنا
احنا خلينا فى حالنا
مهما كات النار بعيدة
إن سكتنا هتيجى دارنا


إن سكتنا هتيجى دارنا


إن سكتنا هتيجى دارنااااااااا


 

قيم الإجاية

0


تنبيه : لا يمكنك المشاركة قبل التسجيل !    تسجيل

يمنع اضافة روابط خارجية او اعلانات ، والعضو الذى يخالف ذلك فى الأسئلة أو الاجابات او التعليقات سيتم حذف مشاركته ووقف عضويته بالموقع تماماً